Dr Alicia Bugeja Said twieldet fl-1987 fl-Imġarr u trabbiet f’familja fost erba aħwa. Wara li temmet l-istudji tagħha f’Malta, kisbet dottorat mill-Università ta’ Kent fl-Ingilterra fl-2017. Wara dan, ħadmet bħala riċerkatriċi postdottorali fil-Kanada u sussegwentement fi Franza. Fl-2020, ġiet maħtura bħala Direttur tas-Sajd fi ħdan il-Ministeru għall-Agrikoltura, is-Sajd u d-Drittijiet tal-Annimali.
Dr Bugeja Said dejjem emmnet fil-valur ta’ politika bbażata fuq l-evidenza xjentifika, filwaqt li tibqa’ qrib in-nies u l-komunitajiet. Temmen li bidla vera trid tkun mibnija fuq il-valuri tas-solidarjetà, is-sostenibbiltà u r-rispett lejn kull forma ta’ ħajja, sabiex titjieb il-kwalità tal-ħajja tal-familji Maltin u Għawdxin.
Bħala Direttur tas-Sajd, Bugeja Said tat diversi kontribuzzjonijiet fl-oqsma taħt ir-responsabbiltà tagħha u mexxiet inizjattivi li kellhom impatt pożittiv fuq is-settur. Fl-2022, il-Prim Ministru Robert Abela stedinha biex tikkontesta l-elezzjoni ġenerali u fdalha l-fiduċja biex isservi bħala Segretarju Parlamentari.
Illum, bħala Segretarju Parlamentari fi ħdan il-Ministeru għall-Enerġija, l-Ambjent u r-Riġenerazzjoni tal-Port il-Kbir responsabbli mill-Benesseri tal-Annimali, Alicia Bugeja Said tmexxi l-ħidma tal-Gvern favur il-ħarsien, il-benesseri u d-drittijiet tal-annimali. Il-portafoll tagħha jinkludi l-promozzjoni ta’ standards ogħla ta’ benesseri għall-annimali, it-tkomplija tar-riformi meħtieġa fis-settur, u kollaborazzjoni kontinwa mal-għaqdiet, il-veterinarji u l-partijiet interessati kollha.
Hija determinata li tkompli taħdem sabiex il-politika dwar il-benesseri tal-annimali tibqa’ waħda progressiva, b’saħħitha u ffukata fuq il-ħtiġijiet kemm tal-annimali kif ukoll tas-soċjetà. Temmen li l-benesseri tal-annimali huwa riflessjoni diretta tal-valuri ta’ pajjiż progressiv u kompassjonat.
Bugeja Said hija miżżewġa lil Malcolm u għandhom żewġt itfal jisimhom Margaux u Maelle.